Hukumar Jin Dadin Alhazai ta Jihar Kaduna ta fara biyan Naira 61,080 ga kowanne mahajjata 6,239 da suka gudanar da aikin Hajji ta Jihar a shekarar 2023.
Hukumar ta karbi wadannan kudade daga Hukumar Alhazai ta kasa (NAHCON). NAHCON ta bayyana musamman cewa an mayar da kudaden ne sakamakon katsewar wutar lantarki da aka samu a lokacin da alhazai ke zaune a Muna, lamarin da ya shafi na’urorin sanyaya tantina da kuma haifar da matsala ga mahajjatan.
Wata sanarwa da kakakin hukumar, Yunusa Mohammed Abdullahi ya sanya wa hannu, ta bayyana cewa kowane mahajjaci zai karbi kudi naira 61,080, kuma za a fitar da wadannan kudade kai tsaye cikin asusun ajiyar maniyyatan da abin ya shafa.
“Za mu yi duk mai yiwuwa don ganin maniyyatan da aka tantance masu dauke da bayanan asusun banki kawai sun karbi kudaden,” in ji Shugaban Hukumar, Malam Salihu S. Abubakar, a wani taro da yayi da jami’an Alhazai na kananan hukumomi a yau.
Sanarwar ta yi kira ga alhazan da abin ya shafa da har yanzu ba su mika bayanansu ba, da su tuntubi jami’an alhazai na karamar hukumarsu domin tantancewa. Abubuwan da ake buƙata don tantancewar, sun haɗa da fasfo na ƙasa da bayanan asusun banki.
Sanarwar ta ce, za a tura dukkan kudaden da za a biya kai tsaye zuwa asusun ajiyar alhazai na banki domin kawar da duk wani sabani.
Shugaban Hukumar, Malam Salihu S. Abubakar, ya bukaci jami’an hukumar da su tabbatar da bin ka’idojin tabbatar da gaskiya da rikon amana.
Sa hannu,
Yunusa Mohammed Abdullahi
Mataimakin Daraktan Hulda da Jama’a