Sabon shugaban hukumar alhazai ta Najeriya (NAHCON), Farfesa Abdullah Saleh, ya samu sakon taya murna daga hukumar gudanarwar ta (Nigeria Hajj and Umrah Special Info) inda suka bayyana kwarin gwuiwarsu cewar Pakistan na iya jagorantar hukumar ta hanyar gaskiya da rikon amana.
A cikin sakon, kungiyar ta taya Farfesa Saleh Pakistan murna kan nadin da aka yi masa, inda ta bayyana shi a matsayin wani gagarumin nauyi da ke zuwa a wani lokaci mai muhimmanci ga hukumar.
Sanarwar ta bayyana kalubalen da magabacinsa ya fuskanta da suka hada da zargin cin hanci da rashawa, sannan ta jaddada muhimmancin maido da amana a cikin hukumar ta NAHCON.
Shugabannin gudanarwar kuniyar sun shawarci Farfesa Abdallahi Pakistan da ya ba da fifiko wajen tabbatar da gaskiya da rikon amana a dukkan ayyuka, inda suka bayar da shawarar samar da ingantacciyar hanyar sa ido domin kare kai daga cin hanci da rashawa da kuma kara sahihancin hukumar.
Don tabbatar da jagoranci mai inganci da samar da gyare-gyare masu ma’ana a cikin NAHCON, sanarwar ta zayyana dabaru da dama don yin la’akari:
- Tafiya da masu ruwa da tsak: Hakan na nufin samun cikakkiyar sadarwa da masu ruwa da tsaki, da suka hada da alhazai, da hukumomin gwamnati, da masu bada hidima.
- Bunkasa Ayyuka Ta Hanyar Fasahar Zamani: Rungumar fasaha don daidaita hanyar aiki, kamar aiwatar da ayyukan kan yanar gizo, biyan kuɗi, da yada bayanai, an ba da shawarar don haɓaka inganci da samun dama ga mahajjata.
- Bayar Da Horo Da Kaifafa Hzakar Ma’aikata: Kungiyar ta bukaci saka hannun jari a horar da ma’aikata don ba su kwarewa da ilimin da suka dace don gudanar da ayyuka masu inganci, tare da jaddada mahimmancin horar da ma’aikata don kirkire-kirkire da gyara.
- Sanya Idanu: An ba da shawarar fayyace ma’auni don tantance tasirin ayyukan. Kimanta ayyukan hukumar na yau da kullun zai taimaka wajen daidaita dabarun da tabbatar da cewa gyare-gyare ya ci gaba.
- Haɓaka ƙa’idodin Tsarin Aiki: An ƙarfafa samar da al’adar gaskiya a cikin hukumar, tare da samar da ka’idoji da hanyoyin da za a ba da rahoton rashin da’a ba tare da tsoron ramuwar gayya ba.
A karshe kungiyar ta bayyana imaninta kan yadda Farfesa Saleh zai iya kawo wa hukumar NAHCON wani sabon sauyi, wanda ke nuna gaskiya, kirkire-kirkire, da hidimar abin koyi ga alhazai.
Kungiyar ta kuma yi masa fatan samun nasara a sabon aikinsa tare da bayyana fatan samun sauye-sauye masu kyau da za su fito karkashin jagorancinsa