Wani Kirista dan kasar Masar mai suna Mina ya lashe kyautar aikin Umrah kyauta bayan ya shiga wata gasar Al-Qur’ani da wata manufa guda daya wato ya taimaka wa makwabciyarsa Musulma ta cika burinta na zuwa Umrah.
Mina ya shiga gasar ne bayan da ya ga makwabciyarsa, wadda aka fi sani da Um Ali ko Mona, tana cikin mahalarta gasar da wani malamin addinin Musulunci, Dr Ayman Abu Omar, ya shirya.
Duk da cewa Mina Kirista ne, ya yanke shawarar shiga gasar ne domin idan Um Ali ba ta samu nasara ba, shi ya samu damar lashe kyautar a madadinta.
Mina ya ce: “Ni Kirista ne, amma na shiga gasar addinin Musulunci ne,” yana bayyana cewa manufarsa kawai ita ce ya taimaka wa makwabciyarsa wajen cika burinta na ziyartar wurare masu tsarki.
Ya Amsa Tambayar Fiye da Sau 50
Domin kara yawan damar da yake da ita ta lashe gasar, Mina ya rika aika amsar da ta dace wato 50 fiye da sau 50 zuwa 60.
Dagewarsa ta yi amfani, inda daga bisani aka zabe shi a matsayin wanda ya lashe kyautar Umrah ta kyauta.
Kamar yadda ya kuduri aniyar yi tun farko, Mina ya yanke shawarar ba wa Um Ali kyautar Umrah din.
A nata bangaren, Um Ali ta bayyana matukar farin cikinta da wannan karamci.
Ta ce yin Umrah ya kasance daya daga cikin manyan burinta na tsawon lokaci, kuma ta kasance tana addu’ar samun damar zuwa aikin Umrah tun tana da karfin jiki da zai ba ta damar yin tafiya cikin sauki.
Lokacin da Mina ya sanar da ita cewa ta samu kyautar Umrah, farin cikin ya mamaye ta har aka gan ta tana share hawaye.
Mina ya ce: “Ban taba sanin cewa Umrah na iya haifar da irin wannan farin cikin ba.”
Abota da Ta Shafe Shekaru Sama da 20
Mina ya bayyana cewa alakar da ke tsakaninsa da Um Ali da iyalanta ta samo asali ne tun sama da shekaru 20 da suka gabata, kuma ta wuce dangantakar makwabta ta yau da kullum.
Ya ce yana kallon Um Ali tamkar yayarsa, yayin da yake girmama iyayenta tare da nuna musu kulawa kamar yadda yake yi wa ‘yan uwansa na jini.
Lamarin ya jawo hankali a matsayin wani kyakkyawan misali na abota, tausayi, karamci da mutunta juna tsakanin mutane masu addinai daban-daban.