Ma’aikatar harkokin cikin gida ta Saudiyya na ci gaba da ayyukanta na hana mutanen da ba su da izinin aikin Hajji shiga ko zama a Makkah da wurare masu tsarki, inda ta yi gargadin cewa za a kama masu karya doka da masu gudanar da aikin hajjin da ba su izini tare da hukuntasu.
KARANTA LABARI MAKAMANCIN WANNAN: Saudia Arabia ta yi gargadin gudanar da aikin Haji ba tare samun cikakken izini ba
Kamfanin dillancin labaran kasar Saudiyya ya habarta cewa, a kwanakin baya ne jami’an tsaron aikin Hajji a gundumar Al-Hijrah da ke birnin Makkah suka kama wasu ‘yan kasashen waje guda 42 da suke rike da biza iri-iri na ziyara bayan sun saba wa ka’idojin aikin Hajji.
An fara daukar matakin shari’a kan wadanda suka karya doka, kuma hukumomi na kokarin kamo wadanda suka ba su mafaka. A wani labarin kuma, Jami’an tsaron Alhazan sun kama wani dan kasar Ghana da laifin yunkurin jigilar wasu mata hudu zuwa Makka ba bisa ka’ida ba, wanda ya saba wa dokokin aikin Hajji.
Mutumin da ke tuka motar bas, ya boye matan ne a dakin da ake ajiye kaya a wani yunkuri na shigar da su cikin birnin mai alfarma ba tare da izini ba.
An kama direban da fasinjojin tare da mika shi ga kwamitin da ya dace domin daukar matakin shari’a, kamar yadda SPA ta ruwaito. Ma’aikatar ta sanar da ci tarar kudi har SR100,000 kwatankwacin dalar Amurka 26,600 ga duk wanda ke jigilar kaya ko yunkurin jigilar masu dauke da biza zuwa Makkah da wurare masu tsarki.
Haka hukuncin ya shafi masu masauki ko matsuguni da suka ziyarci masu biza a kowane irin gida ciki har da otal-otal, gidaje, gidaje masu zaman kansu, wuraren kwana, ko gidajen Hajji a cikin Makkah da wurare masu tsarki, ko kuma taimakawa wajen zamansu na haram.
Hukunce-hukuncen sun karu dangane da adadin mutanen da aka yi jigilar su, da su, ko aka taimaka, in ji SPA. Yin ko yunƙurin yin aikin Hajji ba tare da izini ba, ko shiga ko tsayawa a Makkah da wurare masu tsarki ba tare da izini ba, na iya haifar da tarar har SR20,000.
Ma’aikatar ta ce za a kori mazauna da mahajjata da ba su da izini daga kasashen waje tare da hana su shiga Masarautar na tsawon shekaru 10. Ma’aikatar ta sanar da cewa wa’adin dokar ya fara ne daga ranar 29 ga Afrilu zuwa 10 ga watan Yuni.
Ta bukaci cikakken bin ka’idojin aikin Hajji don tabbatar da amincin alhazai da gudanar da ayyukan ibada cikin sauki. Ya kamata a ba da rahoton cin zarafi ta hanyar 911 a Makkah, Riyadh, da Lardin Gabas, ko 999 a wani wuri na Masarautar.